الرئيسية
البوابة
التسجيل
دخول
يا كثر ما رافقت خلان وأصحاب
وياكثر ما في شدتي هملوني
على كثر ما أعدهم ستر وحجاب
على كثر ما احتجتهم وتركوني
من صارت الخوة ثمن حفنة تراب
نفس الوجيه اللي نصوني نسوني
من غير ذكر عروق وفروق وأنساب
كانوا ثلاثة والثلاثة جفوني
علمتهم كيف الأهداف تنصاب
ولما سواعدهم قوت صوبوني
عشاني أصغرهم عمر صاروا أحزاب
عشاني أصدقهم قصيد ظلموني
اللي نجاح أسمي زرع فيهم أنياب
حتى النصيحة ما بغوا ينصحوني
دام العطايا عندهم دين وأتعاب
والله لو أطلب ذنبهم ما عطوني
طالب نصيحة كني مطالب رقاب
وهي نصيحة كيف لو زوجوني
كنت أكتب لنفسي مشاريه وعتاب
ولا أدري ان اللي قروني .. قروني
تضاربت من دوني عقول وألباب
واجد بغوا غيري واجد بغوني
أقفل هدب تسهر على شعري أهداب
كني حبست رقادهم في جفوني
لو شفتهم واحد يشوفوني أسراب
من وين ما لدوا نظرهم لقوني
أثري وجودي بينهم محرق أعصاب
ومزعل بعضهم من بعض لو طروني
يا كبري بعيني وأنا توني شاب
وأهم كتاب الشعر حاربوني
حتى ولو يهوي على نجمي شهاب
يكفيني أن اسمي كبير بعيوني
قد قال أبوي إن هبتهم قول ما هاب
ولو يقدرونك قول ما تقدروني
وما دام قبري محتضن راس مرقاب
على قد ما تقدرون ادفنوني
لو ماني بذيب نهشت عظمي ذياب
ولو ماقدرت أثبت وجودي لغوني
لو ماسكنت وجيههم مت بغياب
لو ما عرفت أمحي ورقهم محوني
ما جيت أبدبل كبدهم شعر وخطاب
لين دبلوا كبد الذي خلفوني
ياويل وجهي كن للدمع مخلاب
ما جف ماه وما استحى من طعوني
كل ما طرالي منظر مريب وارتاب
كان الوحيد اللي يحرك شجوني
قبلة صلاة وذكر وخشوع وكتاب
وأمي على سجادة النور دوني
تدعي لي الله يفتح بوجهي ابواب
تتوسله بالشدة يكون عوني
من كثر ما خفاقها بالدعا ذاب
صارت تحس إن زملاي كرهوني
بشرتها يمه معي ربع وأصحاب
ماني لحالي واجد اللي يبوني
من يوم ما حاز قلمي كل الألقاب
قلطتهم في دفتري وحفظوني
الله وهبني هم بني عم وأجناب
من يوم ما جيت أعجبتهم و أعجبوني
وإعجابه فيني ما هو بية إعجاب
باسلوبي بشرحي بطرحي .. بلوني
لو قلت عن نفسي بشر صرت كذاب
لو قلت دمي من ذهب صدقوني
لو كيفهم زرعوا دربي أعشاب
لو بيدهم يتشبهون.. شبهوني
من كثر ما صاروا من طبوعي قراب
حتى بلبسة شمغهم قلدوني
واجد دعوني وأغلقوا من دوني الباب
وكثار ناس أبكي لهم ما بكوني
لو طالوا لهدمي مناسيب و أطناب
كان وغلاتك من زمان اهدموني
ما دام حطوا فيني عيوب وأسباب
جنبت عنهم مثل ما جنبوني
أصلا.. لو ان بخوتي شي ينعاب
ذبحت نفسي قبل لا يذبحوني
أنا يدي لو ما كست متني ثياب
نذرا علي أقطع يدي من متوني
مو عيب أجي مدعو ولا أشوف ترحاب
العيب لو أني رجعت أن دعوني
ما دمت أجي ولا اشوف ترحاب
حرمت أروح إذا يبوني يجوني
